Hanna Dóra Höskuldsdóttir, Umf. Selfoss gerði góða ferð á innanhússkastmót í Tipshallen í Växjö í Svíþjóð um síðustu helgi, þar sem hún keppti í kúluvarpi og kringlukasti.
Hún byrjaði á því að bæta sig í kúluvarpi, strax eftir 12 klukkustunda langt ferðalag, þegar hún kastaði kúlunni 10,68 m og endaði í 5. sæti.
Hún keppti svo í kringlukasti en engin kona af sambandssvæði HSK hefur áður keppt í kringlukasti innanhúss. Hanna Dóra fór því létt með að setja héraðsmet í greininni, bæði í kvennaflokki og 20-22 ára flokki þegar hún kastaði 31,08 m. Í næstu tilraun bætti hún svo eigið héraðsmet með því að kasta 35,76 metra, sem skilaði henni 11. sætinu og samtals fjórum héraðsmetum.
Þetta er góður árangur hjá Hönnu Dóru sem höndlaði aðstæðurnar vel en hún var að keppa við mjög marga sterka andstæðinga fyrir framan fjölda áhorfenda með tilheyrandi stemningu og látum.