Hamar heimsótti Ármann í Laugardalshöllina í úrslitaeinvígi 1. deildar karla í körfubolta í kvöld. Þetta var fyrsti leikur liðanna og er óhætt að segja að Ármenningar hafi unnið sannfærandi sigur.
Allar varnir lágu niðri hjá Hvergerðingum stærstan hluta leiksins á meðan Ármann fór á kostum í sókninni. Staðan í hálfleik var 67-54 og þegar þriðji leikhluti var búinn hafði Ármann gert út um leikinn, 102-77. Munurinn breyttist ekki í fjórða leikhluta og Ármann sigraði að lokum 125-100.
Jaeden King var stiga- og framlagshæstur hjá Hamri með 37 stig og 9 fráköst. Jose Medina skoraði 22 stig og sendi 9 stoðsendingar og Ragnar Nathanaelsson skoraði 12 stig og tók 12 fráköst.
Liðin mætast næst í Hveragerði á laugardaginn en það lið sem fyrr vinnur þrjá leiki tryggir sér sæti í úrvalsdeildinni.
Ármann-Hamar 125-100 (37-29, 30-25, 35-23, 23-23)
Tölfræði Hamars: Jaeden King 37/9 fráköst, Jose Medina 22/4 fráköst/9 stoðsendingar, Ragnar Nathanaelsson 12/12 fráköst, Fotios Lampropoulos 7/7 fráköst, Björn Ásgeir Ásgeirsson 7, Birkir Máni Daðason 6, Lúkas Aron Stefánsson 4, Egill Þór Friðriksson 3, Kristófer Kató Kristófersson 2, Daníel Sigmar Kristjánsson 5 fráköst.