Hamar vann stórsigur á ÍH í 4. deild karla í knattspyrnu í kvöld á meðan KFR gerði jafntefli við Vængi Júpíters.
Hamar var í heimsókn í Skessunni og vann þar þægilegan sigur á ÍH. Guido Rancez kom þeim yfir á 22. mínútu og hann bætti svo öðru marki við á 34. mínútu. Fjórum mínútum síðar fengu ÍH-ingar vítaspyrnu en Stefán Þór Hannesson varði spyrnuna og staðan var 0-2 í hálfleik.
Hamar gerði svo endanlega út um leikinn með fimm mörkum á fyrsta korterinu í seinni hálfleik. Rancez skoraði tvívegis og þeir Kristófer Örn Kristmarsson, Rodrigo Depetris og Óliver Þorkelsson skoruðu allir eitt mark. Staðan orðin 0-7 þegar hálftími var eftir en ÍH skoraði sárabótarmark rétt fyrir leikslok og leiknum lauk með 1-7 sigri Hamars.
Vængir Júpíters og KFR mættust í Egilshöll og þar komust Vængir yfir undir lok fyrri hálfleiks. Staðan var 1-0 í leikhléinu. Rangæingar byrjuðu betur í seinni hálfleiknum og strax eftir tvær mínútur hafði Þórður Kalman Friðriksson jafnað metin. Unnar Jón Ásgeirsson kom KFR svo yfir á 66. mínútu en Vængir jöfnuðu jafnharðan. Bæði lið áttu fínar sóknir á síðustu tuttugu mínútunum en mörkin urðu ekki fleiri og leiknum lauk með 2-2 jafntefli.
Hamar er í toppsæti deildarinnar með 34 stig en KFR er í 8. sæti með 9 stig.