Hamarsmenn eru fallnir niður í 2. deild karla í körfubolta eftir tap gegn Snæfelli í lokaumferð 1. deildarinnar í kvöld, 110-101.
Á sama tíma sigruðu nýliðar Fylkis Breiðablik 85-82 og Fylkismenn björguðu sér þar með frá falli. Fylkir og Hamar eru með 8 stig, eins og Þór Ak. en Hamarsmenn standa verst að vígi innbyrðis og eru því fallnir. Í ár eru 29 ár síðan Hamar lék síðast í 2. deildinni.
Leikurinn í Stykkishólmi í kvöld var kaflaskiptur í fyrri hálfleik, Snæfell skoraði 39 stig í 1. leikhluta en Hamarsmenn bættu sig bæði í vörn og sókn í 2. leikhluta og staðan var 59-49 í hálfleik. Jafnræði var með liðunum í seinni hálfleik en Snæfell var skrefi á undan allan tímann og Hvergerðingum tókst ekki að brúa bilið.
Isaac Johnson var framlagshæstur Hvergerðinga í kvöld með 29 stig og 7 fráköst.
Snæfell-Hamar 110-101 (39-20, 20-29, 21-21, 30-31)
Tölfræði Hamars: Isaac Johnson 29/7 fráköst, Franck Kamgain 27/5 fráköst/5 stoðsendingar, Egill Þór Friðriksson 11, Ryan Benjamin Peters 10/11 fráköst, Birkir Máni Daðason 9, Björn Ásgeir Ásgeirsson 9, Lúkas Aron Stefánsson 6/4 fráköst.