Hamar tapaði 0-8 þegar liðið fékk ÍA í heimsókn í 1. umferð Mjólkurbikars kvenna í knattspyrnu á Grýluvöll í Hveragerði í dag. Hamar leikur í 2. deildinni í sumar en ÍA er deild ofar.
Þetta var fyrsti opinberi knattspyrnuleikur kvennaliðs Hamars en liðið var sett á laggirnar í vetur. Það var vel mætt á völlinn og meðal annars slepptu Hvergerðingar dúfum fyrir leik, til þess að fagna þessum tímamótum.
Dúfurnar tóku lystilega á loft en Hamarskonur komust ekki á flug í upphafi leiks því ÍA skoraði mark í tveimur fyrstu sóknum leiksins, þannig að staðan var orðin 0-2 eftir rúmlega tvær mínútur.
Hvergerðingar hristu úr sér hrollinn eftir það en ÍA var sterkari aðilinn allan leikinn og bætti við tveimur mörkum til viðbótar í fyrri hálfleik.
Staðan var 0-4 í leikhléi og gestirnir frá Akranesi skoruðu fjögur mörk til viðbótar í seinni hálfleiknum. Lokatölur 0-8.
