Hamar hafði betur í toppslagnum gegn Hetti í 1. deild karla í körfubolta á Egilsstöðum í kvöld, 70-75.
Leikurinn var jafn og spennandi allan tímann. Höttur leiddi í hálfleik, 38-35, en Hamarsmenn voru sterkari í seinni hálfleiknum. Höttur hafði þó forystuna lengi vel en Hvergerðingar skelltu í lás þegar þrjár og hálf mínúta voru eftir af leiknum og skoruðu níu síðustu stig leiksins.
Everage Richardson var besti maður vallarins í kvöld, hann skoraði 30 stig og tók 16 fráköst auk þess að senda 6 stoðsendingar. Michael Philips skoraði 19 stig og Matej Buovac 12.
Þrátt fyrir tapið heldur Höttur toppsætinu með 28 stig en Hamar er í 2. sæti með 26 stig og á leik til góða á Hattarmenn.