Hamar vann gríðarlega mikilvægan sigur á Skallagrími í toppbaráttu C-riðils 4. deildar karla í knattspyrnu á Grýluvelli í Hveragerði í kvöld.
Bjarki Rúnar Jónínuson kom Hamri yfir á 26. mínútu og tæpum tíu mínútum síðar skoruðu Skallagrímsmenn sjálfsmark eftir snarpa sókn Hamars.
Staðan var 2-0 í hálfleik en Ingþór Björgvinsson kom Hamri í 3-0 þegar fimmtán mínútur voru liðnar af síðari hálfleik. Hreppamaðurinn Magnús Helgi Sigurðsson minnkaði muninn fyrir Skallagrím á 73. mínútu og Arnar Eiríksson bætti við marki fyrir þá gulgrænu í uppbótartíma.
Jón Bjarni Sigurðsson átti hins vegar síðasta orðið þegar hann skoraði fjórða mark Hamars á fjórðu mínútu uppbótartímans og tryggði Hamri 4-2 sigur.
Með sigrinum hrifsuðu Hamarsmenn toppsætið af Skallagrími og eru Hvergerðingar nú í góðum málum í efsta sæti riðilsins með 15 stig.