KFR tók á móti Hamri í 4. deild karla í knattspyrnu á Helluvelli í kvöld og á sama tíma heimsótti Árborg Úlfana í Úlfarsárdalinn.
Hvergerðingar byrjuðu af miklum krafti gegn KFR og voru komnir í 0-4 eftir rúman hálftíma. Genaro Peresutti kom þeim yfir á 8. mínútu, Brynjólfur Þór Eyþórsson bætti við marki á 19. mínútu og sex mínútum síðar kom Rodrigo Depetris þeim í 0-3. Tómas Bjartur Björnsson bætti fjórða markinu við á 33. mínútu en tveimur mínútum síðar minnkaði Rúnar Þorvaldsson muninn og staðan var 1-4 í hálfleik.
KFR fékk vítaspyrnu á upphafsmínútum seinni hálfleiks og úr henni skoraði Helgi Valur Smárason og staðan orðin 2-4. Það voru hins vegar Hamarsmenn sem áttu lokaorðið, Peresutti breytti stöðunni í 2-5 tveimur mínútum síðar og þar við sat.
Það var öllu minna fjör á Lambhagavellinum þar sem Árborg heimsótti Úlfana. Heimaliðið byrjaði betur í leiknum en færin voru fá og staðan var 0-0 í hálfleik. Það breyttist ekki í seinni hálfleik, þar sem Árborg hafði yfirhöndina og fékk nokkur dauðafæri en boltinn vildi ekki í netið.
Staðan í 4. deildinni er þannig að Árborg er í 2. sæti með 7 stig, Hamar í 3. sæti með 6 stig og KFR í 10. sæti, án stiga.