Hamar og Árborg mættust á Grýluvelli í kvöld í 4. deild karla í knattspyrnu. Bæði lið eru í toppbaráttu deildarinnar en Hamar styrkti stöðu sína með öruggum 3-0 sigri.
Hvergerðingar voru sterkari í fyrri hálfleik og Rodrigo Depetris kom þeim yfir með góðu marki á 11. mínútu. Brynjólfur Þór Eyþórsson tvöfaldaði svo forskotið á 24. mínútu og þannig stóðu leikar í hálfleik, þrátt fyrir að bæði lið hefðu getað bætt við mörkum.
Seinni hálfleikurinn var í járnum, Árborgarar fundu fáar leiðir upp að marki Hamars en Hvergerðingar bættu þriðja markinu við úr skyndisókn á 67. mínútu. Þar var Depetris aftur á ferðinni og tryggði hann Hamri 3-0 sigur.