Hamar tók á móti 2. deildarliði Dalvíkur/Reynis í 16-liða úrslitum Gatorate-bikarsins, bikarkeppni neðrideildaliða í kvöld.
Leikurinn var fyrsti meistaraflokksleikurinn á nýjum gervigrasvelli Hvergerðinga og Hamarsmenn virtust finna sig vel á vellinum. Þeir vörðust skynsamlega gegn sterku liði Dalvíkur/Reynis og freistuðu þess svo að sækja hratt.
Dalvík/Reynir komst yfir á lokamínútu fyrri hálfleiks og staðan var 0-1 í leikhléi. Hamarsmenn voru með vindinn í fangið í seinni hálfleik og Dalvík/Reynir sótti meira en Hamar átti ágætar rispur.
Gestirnir skoruðu aftur á 68. mínútu og kældu þar með vonir Hamars til muna. Hvergerðingar áttu þó lokaorðið og varamaðurinn Máni Snær Benediktsson minnkaði muninn í uppbótartímanum.
Hamar er því úr leik en Dalvík/Reynir verður í pottinum þegar dregið verður í 8-liða úrslitin.