Hamar tryggði sér í kvöld sæti í 3. deild karla í knattspyrnu að ári eftir stórsigur á Álafossi á Grýluvelli í 4. deildinni í kvöld. Á sama tíma gerði Árborg jafntefli við Elliða á útivelli.
Hvergerðingum dugði að ná í stig í kvöld til að tryggja sætið en ekkert annað kom til greina en sigur hjá Hamri sem hefur verið á mikilli siglingu í sumar og ekki tapað leik síðan í 1. umferð. Guido Rancez kom Hamri yfir strax á 4. mínútu og reyndist það eina mark fyrri hálfleiks. Brynjólfur Eyþórsson og Rodrigo Depetris bættu við mörkum á fyrstu tíu mínútum seinni hálfleiks og Óliver Þorkelsson kom Hamri í 4-0 á 66. mínútu. Fimmta markið leit svo dagsins ljós í uppbótartímanum og reyndist það sjálfsmark Mosfellinga. Lokatölur 5-0 og Hamar fagnaði vel eftir að flautað hafði verið til leiksloka.
Það var meiri spenna í leik Elliða og Árborgar í Árbænum. Elliði komst yfir á 21. mínútu en Magnús Arnar Hafsteinsson jafnaði metin fyrir Árborg á 45. mínútu og staðan var 1-1 í hálfleik. Árborg sótti mun meira í seinni hálfleiknum en fékk mark í andlitið á 67. mínútu utan af miðjum velli. Þorsteinn Daníel Þorsteinsson náði hins vegar að bjarga stigi fyrir Árborg með jöfnunarmarki á 90. mínútu eftir þunga sókn mínúturnar á undan og leiknum lauk með 2-2 jafntefli.
Þegar tvær umferðir eru eftir af deildinni er Hamar í 2. sæti með 43 stig en Árborg í 3. sæti með 33 stig.