Hamar fékk Þrótt Reykjavík í heimsókn í úrvalsdeild karla í blaki á föstudagskvöld. Hamar sigraði 3-0 og tryggði sér um leið deildarmeistaratitilinn.
Hamar vann fyrstu hrinuna sannfærandi, 25-16, en meira jafnræði var í annarri hrinu. Í stöðunni 17-17 tóku Hvergerðingar góðan sprett og sigruðu 25-18 í hrinunni. Þriðja hrinan var hins vegar æsispennandi en Hamar var sterkari á lokakaflanum, sigraði hrinuna 25-23 og leikinn þar með 3-0.
Hamarsmenn tóku við verðlaunum fyrir deildarmeistaratitilinn í leikslok og fögnuðu vel með stuðningsmönnum sínum.