Hamar tryggði sér oddaleik

Hamarskonur sigruðu KR í fjórða leik liðanna í úrslitum Íslandsmóts kvenna í körfubolta í Hveragerði í dag. Lokatölur voru 81-75.

KR byrjaði betur í leiknum og leiddi að loknum fyrsta leikhluta, 17-25. Hamar náði að komast yfir í 2. leikhluta og leiddu í hálfleik, 45-42.

Síðari hálfleikur var jafn og spennandi en Hamarskonum tókst að verja forskot sitt með Juliu Demirer fremsta í vörn og sókn.

Demirer var með risatvennu í leiknum, skoraði 23 stig og tók 26 fráköst. Koren Schram skoraði 20 stig, Kristrún Sigurjónsdóttir 11 og Guðbjörg Sverrisdóttir 10.

Liðin horfa því fram á hreinan úrslitaleik um Íslandsmeistaratitilinn og verður hann í DHL höllinni í Vesturbænum á þriðjudagskvöld kl. 19:15.