Hamar-Þór vann glæsilegan sigur á Aþenu/Leikni/UMFK í 1. deild kvenna í körfubolta í kvöld, þegar liðin mættust í Austurbergi í Breiðholti.
Leikurinn var jafn á upphafsmínútunum en undir lok 1. leikhluta tók Hamar-Þór sprett sem skilaði þeim tíu stiga forskoti, 13-23. Aþena svaraði fyrir sig í 2. leikhluta en Hamar-Þór hélt forystunni og leiddi 35-42 í hálfleik.
Þær sunnlensku voru sterkari aðilinn allan seinni hálfleikinn og bættu jafnt og þétt við forskot sitt. Hamar-Þór vann að lokum öruggan sigur, 63-80.
Yvette Adriaans var best í liði Hamars-Þórs með 26 stig og 14 fráköst og þær Jenna Mastellone og Gígja Rut Gautadóttir voru sömuleiðis öflugar.
Bestar í liði Aþenu voru Hvergerðingarnir Ása Lind Wolfram og Elektra Mjöll Kubrzeniecka, en í sameiningu skoruðu þær helminginn af stigum liðsins.
Staðan í deildinni er þannig að Hamar-Þór er í 4. sæti með 18 stig en Aþena er í 7. sæti með 12 stig.
Aþena/Leiknir/UMFK – Hamar-Þór 63-80 (13-23, 22-19, 11-18, 17-20)
Tölfræði Hamars-Þórs: Yvette Adriaans 26/14 fráköst/3 varin skot, Jenna Mastellone 19/5 fráköst/3 varin skot, Gígja Rut Gautadóttir 13, Emma Hrönn Hákonardóttir 11/6 fráköst, Hildur Björk Gunnsteinsdóttir 6/5 fráköst, Stefanía Ósk Ólafsdóttir 3, Ragnhildur Arna Kristinsdóttir 2.