Hamar/Þór tók á móti Ármanni í úrvalsdeild kvenna í körfubolta í Hveragerði í dag. Áhorfendur fengu mikið fyrir peninginn en leikurinn var þríframlengdur og hafði Hamar/Þór sigur að lokum, 107-104.
Ármann var feti framar í 1. leikhluta en í 2. leikhluta tóku þær sunnlensku við sér og leiddu 46-39 í hálfleik. Byrjunin í seinni hálfleik var hins vegar döpur hjá heimakonum og Ármann jafnaði 48-48 og komst svo yfir í kjölfarið. Síðasti fjórðungurinn var hnífjafn en Jada Guinn tryggði Hamri/Þór framlengingu með því að jafna 81-81 á lokasekúndu leiksins.
Ármann tók forystuna í fyrstu framlengingunni en Hamar/Þór skoraði síðustu fjögur stigin og Jada Guinn jafnaði 89-89. Það sama var uppi á teningnum í 2. framlengingu og enn og aftur var það Jada Guinn sem jafnaði 99-99 á lokaandartökunum. Það var svo loks í 3. framlengingu að Hamar/Þór tók leikinn í sínar hendur og tryggðu sér að lokum þriggja stiga sigur.
Jada Guinn var með risatölur fyrir Hamar/Þór, hún skoraði 52 stig, tók 10 fráköst og sendi 8 stoðsendingar.
Hamar/Þór lyfti sér úr botnsæti B-riðilsins með sigrinum og sendi Ármann niður fyrir sig. Hamar er með 8 stig en Ármann 6.
Hamar/Þór-Ármann 107-104 (19-22, 27-17, 10-21, 25-21, 8-8, 10-10, 8-5)
Tölfræði Hamars/Þórs: Jada Guinn 52/10 fráköst/8 stoðsendingar, Ana Clara Paz 25/8 fráköst, Mariana Duran 13/13 fráköst/9 stoðsendingar/5 stolnir, Jovana Markovic 7/12 fráköst, Bergdís Anna Magnúsdóttir 4, Matilda Sóldís Svan Hjördísardóttir 3, Jóhanna Ýr Ágústsdóttir 3.