Hamar/Þór sópaði Selfossi út úr umspili um sæti í úrvalsdeild kvenna með 94-70 sigri í þriðja leik liðanna í Þorlákshöfn í kvöld.
Hamar/Þór vann einvígið 3-0 og mætir Fjölni í úrslitum umspilsins. Selfoss verður áfram í 1. deildinni á næsta tímabili og geta unað vel við sitt eftir góðan vetur.
Heimakonur í Þorlákshöfn höfðu mikla yfirburði í kvöld og staðan í hálfleik var 58-30. Sigurinn var innsiglaður í 3. leikhluta en staðan var orðin 85-48 þegar sá fjórði hófst. Selfoss klóraði í bakkann í 4. leikhluta en ógnaði sigri Hamars/Þórs aldrei.
Jada Guinn var besti maður vallarins í kvöld hún skoraði 24 stig fyrir Hamar/Þór, tók 10 fráköst og sendi 8 stoðsendingar. Hjá Selfyssingum var Jessica Tomasetti öflug með 16 stig, 8 fráköst og 6 stoðsendingar.
Hamar/Þór-Selfoss 94-70 (34-16, 24-14, 27-18, 9-22)
Tölfræði Hamars/Þórs: Jada Guinn 24/10 fráköst/8 stoðsendingar, Jovana Markovic 22/10 fráköst, Ana Clara Paz 20/7 fráköst, Bergdís Anna Magnúsdóttir 11/5 fráköst/6 stoðsendingar, Mariana Duran 8/6 fráköst/5 stoðsendingar, Jóhanna Ýr Ágústsdóttir 3, Sólveig Grétarsdóttir 2, Jara Björg Gilbertsdóttir 2, Dagrún Inga Jónsdóttir 2.
Tölfræði Selfoss: Jessica Tomasetti 16/8 fráköst/6 stoðsendingar, Valdís Una Guðmannsdóttir 16, Gígja Marín Þorsteinsdóttir 12, Sigríður Svanhvít Magnúsdóttir 6/6 fráköst, Perla María Karlsdóttir 6/4 fráköst, Mathilde Boje Sorensen 5, Heiður Hallgrímsdóttir 5/5 fráköst, Anna Katrín Víðisdóttir 4.