Hamar/Þór kreisti fram sigur á lokamínútunni

Lið Hamars/Þórs eftir sigur í Grindavík í síðustu umferð. Ljósmynd/Hamar-Þór Körfubolti

Hamar/Þór vann nauman sigur á Stjörnunni í 1. deild kvenna í körfubolta í Þorlákshöfn í kvöld. Lokatölur urðu 77-74.

Gestirnir úr Garðabæ byrjuðu betur í leiknum og leiddu með 11 stigum að loknum 1. leikhluta, 13-24. Hamar/Þór svaraði fyrir sig í 2. leikhluta og staðan í hálfleik var 37-38.

Þriðji leikhluti var jafn og spennandi en Stjarnan náði frumkvæðinu þegar leið á hann og þær héldu forystunni meira eða minna fram á lokamínútuna.

Þegar tvær og hálf mínúta var eftir af leiknum var staðan 68-72 en þá gerði Hamar/Þór 9-2 áhlaup og tryggði sér sigurinn.

Hamar/Þór er í 2. sæti deildarinnar með 4 stig að loknum þremur leikjum.

Tölfræði Hamars/Þórs: Fallyn Stephens 37/6 fráköst, Gígja Marín Þorsteinsdóttir 13, Hrafnhildur Magnúsdóttir 10/10 fráköst/8 stoðsendingar, Ása Lind Wolfram 8/4 fráköst, Þórunn Bjarnadóttir 7/10 fráköst, Helga María Janusdóttir 2, Hildur Björk Gunnsteinsdóttir 6 fráköst.