Hamar/Þór mun leika í úrvalsdeild kvenna á næsta keppnistímabili eftir að hafa sópað Fjölni út úr úrslitaeinvígi um sæti í deildinni. Hamar/Þór vann þriðja leik liðanna 98-89 í dag og einvígið þar með 3-0.
Leikurinn í dag var jafn í fyrri hálfleik, Hamar/Þór leiddi eftir 1. leikhluta en Fjölniskonur svöruðu fyrir sig áður en flautað var til hálfleiks og staðan var 43-45 í hálfleik.
Fjölnir leiddi nær allan 3. leikhlutann og inn í þann fjórða og þegar sex mínútur voru eftir af leiknum var staðan 73-77. Þær sunnlensku voru hins vegar stórkostlegar á lokakaflanum, þær léku við hvurn sinn fingur og náðu tólf stiga forskoti en lokatölur urðu sem fyrr segir 98-89.
Jada Guinn var stigahæst í liði Hamars/Þórs með 33 stig og 8 stoðsendingar, Ana Clara Paz skoraði 20 og Jóhanna Ýr Ágústsdóttir 18.
Hamar/Þór-Fjölnir 98-89 (22-17, 21-28, 23-26, 32-18)
Tölfræði Hamars/Þórs: Jada Guinn 33/8 stoðsendingar, Ana Clara Paz 20/7 fráköst/7 stoðsendingar, Jóhanna Ýr Ágústsdóttir 18, Jovana Markovic 12/9 fráköst, Mariana Duran 12/6 fráköst/7 stoðsendingar, Dagrún Inga Jónsdóttir 3.