Hamarsmenn hófu í kvöld titilvörn sína á Íslandsmótinu í blaki karla en liðið mætir KA í einvíginu og það lið sem sigrar þrjá leiki verður Íslandsmeistari.
Hamar á heimaleikjaréttinn og tóku þeir því á móti KA í Frystikistunni í Hveragerði í kvöld. Leikurinn var hörkuspennandi þrátt fyrir 3-1 sigur heimamanna og lofar góðu fyrir það sem koma skal í viðureign liðanna.
Heimamenn reyndust sterkari á lokasprettinum í fyrstu tveimur hrinunum og unnu þær báðar 25-21. Þriðja hrina var hörkuspennandi og var m.a. jafnt 15-15 og 18-18. Eftir það skriðu KA menn frammúr og unnu hrinuna 25-23. Í fjórðu hrinu var frumkvæðið heimamanna en KA menn voru aldrei langt undan. Líkt og í fyrstu tveimur hrinunum þá voru Hamarsmenn sterkari á lokasprettinum og unnu hrinuna 25-20 og leikinn þar með 3-1.
Stigahæstur í liði Hamars var Tamas Magyar með 15 stig en í liði KA var það Miguel Mateo með 28 stig.
Næsti leikur liðanna fer fram á Akureyri miðvikudaginn 3. maí.