Hamar vann öruggan 3-0 sigur á KA í kvöld í fyrsta leik liðanna í undanúrslitum Íslandsmóts karla í blaki þegar liðin mættust í Hveragerði.
Hamar vann fyrstu hrinuna þægilega, 25-18, en mótspyrna KA manna var meiri framan af annarri hrinu. Það var ekki fyrr en í stöðunni 18-14 sem heimamenn náðu undirtökunum og unnu hrinuna örugglega 25-15.
Þriðja hrina var aftur á móti hörkuspennandi og voru liðin margoft jöfn að stigum. Eftir að Hamar jafnaði 18-18, tók KA góða syrpu og náði 19-22 forystu en Hamarsmenn voru sterkari á lokasprettinum og náðu að klára hrinuna 25-23 og leikinn þar með 3-0.
Næsti leikur liðanna er fyrir norðan á Akureyri þann 15. apríl. Vinna þarf tvo leiki í undanúrslitum til að komast í úrslit.