Hamar skellti Breiðablik í 1. deild karla í körfubolta í Hveragerði í kvöld á meðan Selfoss tapaði á heimavelli gegn Sindra.
Blikar byrjuðu betur í Hveragerði í kvöld og leiddu 20-27 að loknum 1. leikhluta. Staðan í hálfleik var 48-54. Þriðji leikhluti var í járnum og munurinn breyttist ekki en í 4. leikhluta var mikill kraftur í Hvergerðingum sem söxuðu niður forskot Breiðabliks og komust svo yfir þegar þrjár mínútur voru eftir. Hamar sigraði að lokum 104-100. Franck Kamgain var framlagshæstur Hvergerðinga með 34 stig og 8 stoðsendingar.
Það var sömuleiðis hörkubarátta í jöfnum leik Selfoss og Sindra. Selfoss leiddi 25-23 að loknum 1. leikhluta en Sindramenn voru yfir í hálfleik, 45-47. Selfyssingar höfðu frumkvæðið megnið af 3. leikhluta en munurinn var lítill og þegar þrjár mínútur voru liðnar af 4. leikhluta var staðan 76-76. Þá skoruðu Sindramenn tólf stig í röð og Selfyssingar náðu ekki að svara fyrir sig. Lokatölur urðu 86-99. Kristijan Vladovic var framlagshæstur Selfyssinga með 25 stig og 5 stoðsendingar.
Þegar ein umferð er eftir af deildarkeppninni er Hamar í 11. sæti deildarinnar með 8 stig en Selfoss er í 8. sæti með 18 stig.
Hamar-Breiðablik 104-100 (20-27, 28-27, 23-23, 33-23)
Tölfræði Hamars: Franck Kamgain 34/8 stoðsendingar, Isaac Johnson 25, Birkir Máni Daðason 21/4 fráköst, Ryan Peters 17/18 fráköst, Lúkas Aron Stefánsson 3, Björn Ásgeir Ásgeirsson 2, Arnar Dagur Daðason 2.
Selfoss-Sindri 86-99 (25-23, 20-24, 24-21, 17-31)
Tölfræði Selfoss: Kristijan Vladovic 25/5 stoðsendingar, Steven William Lyles 15/7 fráköst, Collin Anthony Pryor 13/6 fráköst, Tristan Máni Morthens 11, Ari Hrannar Bjarmason 7, Halldór Halldórsson 4, Óðinn Freyr Árnason 3, Birkir Máni Sigurðarson 3, Fjölnir Morthens 3, Gísli Steinn Hjaltason 2.