Sunnlensku liðin léku á útivelli í 4. deild karla í knattspyrnu í kvöld. Hamar gerði jafntefli við Elliða á meðan KFR tapaði gegn ÍH.
Hvergerðingar byrjuðu betur í Árbænum og Óliver Þorkelsson kom Hamri yfir strax á 9. mínútu. Staðan var 0-1 í leikhléi en Elliða tókst að jafna metin þegar tæpt korter var liðið af seinni hálfleik. Mörkin urðu ekki fleiri þrátt fyrir góðar sóknir beggja liða og úrslitin því 1-1.
KFR komst snemma í góð mál gegn ÍH í Skessunni í Hafnarfirði. Þórður Kalman Friðriksson og Unnar Jón Ásgeirsson komu KFR í 0-2 eftir rúmt korter. ÍH náði hins vegar að jafna metin með tveimur mörkum í uppbótartíma fyrri hálfleiks. Þeir fengu vítaspyrnu á 45. mínútu og þremur mínútum síðar lá boltinn aftur í netinu hjá KFR, 2-2 í hálfleik. ÍH menn gerðu svo út um leikinn strax á 5. mínútu síðari hálfleiks með þriðja markinu, lokatölur 3-2.
Þegar ein umferð er eftir af deildinni er Hamar og verður í 2. sæti með 44 stig en úrslitin í kvöld urðu til þess að Álftanes varð deildarmeistari. KFR er á auðum sjó í 6. sætinu með 18 stig.