Hamar vann Árborg í stórleik umferðarinnar í 4. deild karla í knattspyrnu í kvöld og eru Hvergerðingar komnir með annan fótinn upp í 3. deildina. Á sama tíma vann KFR Úlfana og fjarlægist þar með fallsvæðið.
Spennustigið var hátt á Selfossvelli í kvöld þar sem Árborg tók á móti Hamri. Aron Freyr Margeirsson kom Árborg yfir strax á 3. mínútu en Guido Rancez jafnaði með aukaspyrnumarki fjórum mínútum síðar. Leikurinn var í járnum megnið af fyrri hálfleiknum en undir lok hans tóku Hamarsmenn yfirhöndina og Brynjólfur Þór Eyþórsson kom þeim yfir eftir snarpa sókn á 41. mínútu, 1-2 í hálfleik. Þær urðu lokatölur leiksins. Seinni hálfleikurinn var besta skemmtun fyrir þá 407 áhorfendur sem mættu á Selfossvöll í kvöld. Hamar fékk betri færi í seinni hálfleiknum en Árborg þjarmaði að þeim undir lokin en tókst ekki að jafna.
KFR vann bráðnauðsynlegan sigur á Úlfunum á útivelli. Þórður Kalman Friðriksson kom þeim yfir strax á 1. mínútu leiksins og Bjarni Þorvaldsson tvöfaldaði forskotið á 28. mínútu. Rangæingar spiluðu af krafti og börðust vel fyrir stigunum þremur sem tryggja það að þeir fjarlægjast fallsvæðið þegar þrjár umferðir eru eftir af deildinni.
Hamar er í 2. sæti deildarinnar með 40 stig, Árborg í 3. sæti með 32 stig og KFR í 7. sæti með 15 stig, fimm stigum fyrir ofan fallsæti.