Hamar og Ármann mættust í fjórðu viðureigninni í úrslitakeppni 1. deildar karla í körfubolta í Frystikistunni í Hveragerði í kvöld.
Hamarsmenn urðu að sigra til þess að knýja fram oddaleik, ella yrði sætið í úrvalsdeildinni Ármenninga. Það gekk eftir, Hamar sigraði 98-92 eftir æsispennandi lokamínútur.
Hamar byrjaði betur í leiknum en Ármann svaraði fyrir sig undir lok 1. leikhluta og staðan var 24-28 að honum loknum. Þá tóku Hvergerðingar við sér, leiddu 50-43 í hálfleik og tóku svo góða rispu í 3. leikhluta sem tryggði þeim nítján stiga forystu.
Í upphafi 4. leikhluta var staðan 83-64 en þá kom magnað áhlaup frá Ármenningum sem náðu að minnka muninn í þrjú stig, 94-91, þegar ellefu sekúndur voru eftir. Hamar var þá kominn í bónus og Jaeden King brást ekki á vítalínunni þegar mest á reyndi.
Staðan í einvíginu er því 2-2 og liðin mætast í oddaleik í Laugardalshöllinni á mánudagskvöld.
Jose Medina var stigahæstur Hamarsmanna með 35 stig og 9 stoðsendingar en maður leiksins var Jaeden King sem skoraði 20 stig og tók 15 fráköst.
Hamar-Ármann 98-92 (24-28, 26-15, 30-20, 18-29)
Tölfræði Hamars: Jose Medina Aldana 35/9 stoðsendingar, Jaeden Edmund King 30/15 fráköst, Fotios Lampropoulos 12/10 fráköst, Ragnar Agust Nathanaelsson 10/5 fráköst, Daníel Sigmar Kristjánsson 4/6 fráköst, Lúkas Aron Stefánsson 3, Björn Ásgeir Ásgeirsson 2, Birkir Máni Daðason 2.