Hamar tryggði sér í dag sæti í úrslitaleik C-deildar deildarbikars karla í knattspyrnu með öruggum sigri gegn Álafossi á útivelli.
Liðin mættust í Mosfellsbæ og þar kom Brynjólfur Þór Eyþórsson Hamri yfir á 1. mínútu leiksins. Kristófer Örn Kristmarsson tvöfaldaði forskotið á 8. mínútu og Brynjólfur var svo aftur á ferðinni rétt fyrir hálfleik og staðan því 0-3 í leikhléi.
Sævin Máni Lýðsson kom Hvergerðingum í 0-4 á 58. mínútu en Álafoss náði að minnka muninn í 2-4 á þriggja mínútna kafla um miðjan seinni hálfleikinn. Hamar átti hins vegar lokaorðið, þeir fengu vítaspyrnu á 80. mínútu og úr henni innsiglaði Brynjólfur þrennu sína og 2-5 sigur Hamars.
Hamar mætir Álftanesi í úrslitaleiknum næstkomandi föstudag. Álftanes vann 1-3 á Helluvelli í gær. KFR komst í 1-0 í fyrri hálfleik með sjálfsmarki Álftnesinga en gestirnir skoruðu svo þrjú mörk á síðustu átján mínútum leiksins og tryggðu sér sigurinn.