Hamarsmenn eru komnir í úrslitaeinvígið um Íslandsmeistaratitilinn í blaki karla, þriðja árið í röð, eftir 3-0 sigur á Vestra á Ísafirði í dag.
Hamar vann fyrri viðureignina við Vestra einnig 3-0. Þó sigurinn hafi verið öruggur í tölum, þá var um hörkuleik að ræða og spennandi hrinur í rafmagnaðri stemningu í íþróttahúsinu á Ísafirði.
Hamar vann fyrstu hrinuna 19-25 og í 2. hrinu þurfti upphækkun til að knýja fram úrslit í henni en Hamar vann hrinuna að lokum 29-31. Þriðja hrinan fór 20-25 og 3-0 sigur Hamars því í höfn.
Hvergerðingar munu mæta Aftureldingu eða KA í úrslitarimmunni um Íslandsmeistaratitilinn, sem Hamarsmenn hafa unnið undanfarin tvö ár.