Hamar tryggði sér sæti í undanúrslitum bikarkeppni karla í blaki með góðum sigri á KA í Hveragerði í gærkvöldi.
Hamarsmenn mættu þar mun betur stemmdir til leiks og unnu leikinn örugglega 3-0 og tryggðu sér þar með sæti í úrslitahelgi bikarsins. Hvergerðingar eiga því möguleika á að vinna bikarinn aftur eftir vonbrigðin í fyrra, þegar liðið datt út í 8-liða úrslitum.
KA-menn eyddu helginni í Hveragerði því að í dag áttust liðin við aftur, nú í úrvalsdeildinni. Akureyringar voru sprækari en kvöldið áður en það dugði ekki til. Hamar vann leikinn að lokum 3-1 eftir nokkrar spennandi hrinur.
Hamarsmenn eru því sem fyrr á toppi deildarinnar með 38 stig eftir 16 leiki. KA er áfram í fjórða sæti með 33 stig en eiga leik til góða.