Hamarsmenn eru komnir áfram í 16-liða úrslit bikarkeppni karla í körfubolta en Þór Þorlákshöfn og Selfoss eru úr leik.
Hamar heimsótti utandeildarlið Aftureldingar í dag og vann auðveldan sigur. Það var reyndar allt í járnum í fyrri hálfleik og staðan í leikhléi 42-42. En Hvergerðingar áttu seinni hálfleikinn með húð og hári og sigruðu að lokum 67-101. Birkir Máni Daðason var stigahæstur Hamarsmanna með 25 stig en Joshua Hardiman var framlagshæstur með 19 stig og 15 fráköst.
Þór Þorlákshöfn tók á móti úrvalsdeildarliði Vals og gerði Hlíðarendapiltum sannarlega erfitt fyrir. Þór leiddi 26-23 að loknum 1. leikhluta og staðan í hálfleik var 42-39, Þór í vil. Liðin skiptust á um að halda forystunni í 3. leikhluta og þegar sá fjórði hófst var staðan 66-66. Valur byrjaði 4. leikhluta á 14-3 áhlaupi en Þórsarar gáfust ekki upp og jöfnuðu 87-87 þegar tæpar tvær mínútur voru eftir. En Valsmenn hittu betur á lokasekúndunum og sigruðu að lokum 90-92. Djordje Dzeletovic var stigahæstur Þórsara með 26 stig og Jovan Sljivancanin var framlagshæstur með 24 stig og 14 fráköst.
Selfoss fékk sömuleiðis úrvalsdeildarlið í heimsókn þegar Stjarnan mætti í Vallaskóla. Stjörnumenn höfðu undirtökin lengst af en Selfyssingar áttu fína spretti inn á milli. Staðan í hálfleik var 46-63 en Stjarnan náði mest 32 stiga forskoti í seinni hálfleik og engin von um endurkomu heimamanna. Lokatölur urðu 92-112. Aristote Bissokot var stigahæstur Selfyssinga með 20 stig en Avery Sullivan var framlagshæstur með 19 stig og 14 fráköst.
Laugdælir/Uppsveitir taka á móti KV á Laugarvatni annað kvöld þegar 32-liða úrslitum keppninnar lýkur.
Afturelding-Hamar 67-101 (22-26, 20-16, 15-25, 10-34)
Tölfræði Hamars: Birkir Máni Daðason 25/7 fráköst, Joshua Hardiman 19/15 fráköst/3 varin skot, Lúkas Aron Stefánsson 15/11 fráköst/5 stoðsendingar/6 stolnir, Jose Medina 12/5 fráköst/7 stoðsendingar, Nicolas Dierynck 12, Atli Rafn Róbertsson 11/7 fráköst, Arnar Dagur Daðason 3, Hjörvar Steinarsson 2, Birkir Máni Sigurðarson 2, Kristófer Kató Kristófersson 5 fráköst.
Þór Þ.-Valur 90-92 (26-23, 16-16, 24-27, 24-26)
Tölfræði Þórs: Djordje Dzeletovic 26/4 fráköst, Jovan Sljivancanin 24/14 fráköst/3 varin skot, Sigvaldi Eggertsson 20/10 fráköst, Halldór Garðar Hermannsson 11/8 stoðsendingar, Joey Holifield 6, Ísak Júlíus Perdue 3.
Selfoss-Stjarnan 92-112 (22-29, 24-34, 24-28, 22-21)
Tölfræði Selfoss: Aristote Bissokot 20/7 fráköst, Avery Sullivan 19/14 fráköst, Tristan Máni Morthens 15, Halldór Benjamín Halldórsson 14/4 fráköst/7 stoðsendingar, Gísli Steinn Hjaltason 10, Óðinn Freyr Árnason 6, Benjamín Rökkvi Sigvaldason 5, Pétur Hartmann Jóhannsson 2, Fjölnir Morthens 1.