Halldór ráðinn þjálfari U17 landsliðsins

Eyrbekkingurinn Halldór Björnsson hefur verið ráðinn þjálfari U17 ára landsliðs karla í knattspyrnu næstu tvö árin, og mun hann jafnframt taka við hæfileikamótun Knattspyrnusambands Íslands.

Halldór, sem hefur lokið KSÍ-A þjálfara gráðu og markmannsþjálfaragráðu, hefur kennt á þjálfaranámskeiðum KSÍ og var í þjálfarateymi A landsliðs kvenna sem komst í 8 liða úrslit í lokakeppni EM Í Svíþjóð 2013.

Auk þess hefur Halldór þjálfað á Selfossi í áraraðir, meðal annars 2. og 3. flokka karla og kvenna og meistaraflokk kvenna. Þá var hann um tíma í fullu starfi hjá Knattspyrnuakademíu Íslands á Suðurlandi, var í þjálfarateymi meistaraflokks karla hjá Selfossi þegar liðið lék í Pepsi-deildinni og starfaði síðast sem aðstoðarþjálfari meistaraflokks karla hjá Fylki.

Halldór hefur störf í byrjun janúar 2015 og gildir ráðningin til ársloka 2016.