Íþróttahreyfingin fagnar þeim tilslökunum sem gerðar eru í nýrri reglugerð um íþróttastarf en lýsir þungum áhyggjum af unglingunum á framhaldsskólaaldri.
„Þessi hópur virðist hafa gleymst þegar kemur að útfærslu á takmörkunum hverju sinni,“ segir í áskorun sem íþróttahéruðin sendu ráðherrum í ríkisstjórn Íslands fyrir helgi.
„Raddir unga fólksins okkar eru því miður of fáar og þegar við getum ekki hvatt þau til íþróttaiðkunar í jafn langan tíma og raun ber vitni þá höfum við miklar áhyggjur af brottfalli þeirra sem myndi auka líkur á frávikshegðun með tilheyrandi vandamálum,“ segir í áskoruninni.
Íþróttahéruðin hvetja stjórnvöld til að endurskoða afstöðu sína til þessa viðkvæma hóps í þeim afléttingum sem nú þegar eru samþykktar og hleypa fyrrnefndum aldurshópi inn í íþrótta- og æskulýðsstarf á ný, með og án snertinga og með þeim fjöldatakmörkunum sem gilda fyrir íþróttastarf.
Undir áskorunina skrifa 24 ungmenna-, íþrótta- og héraðssambönd, meðal annars Héraðssambandið Skarphéðinn og Ungmennasamband V-Skaftafellssýslu.