Hafþór Þrastarson á leið í Selfoss

Knattspyrnulið Selfoss er að fá varnarmanninn Hafþór Þrastarson að láni frá FH út tímabilið.

Hafþór staðfesti þetta við Fótbolta.net í dag.

Líklegt er að gengið verði frá lánssamningum á morgun og því gæti Hafþór mögulega leikið sinn fyrsta leik gegn Val á sunnudag.

Hafþór hefur ekki átt fast sæti í liði FH í sumar og einungis leikið tvo leiki í Pepsi-deildinni.

Í fyrra var þessi 22 ára gamli leikmaður á láni hjá KA þar sem hann spilaði 19 leiki í fyrstu deildinni.

Selfyssingar hafa verið í leit að miðverði þar sem fyrirliðinn Stefán Ragnar Guðlaugsson er frá keppni vegna meiðsla þessa dagana sem og Agnar Bragi Magnússon sem verður ekkert meira með í sumar.