Akstursíþróttamaðurinn Gyða Dögg Heiðarsdóttir var valin íþróttamaður Ölfuss árið 2015. Valinu var lýst við athöfn í Ráðhúsi Ölfuss síðastliðinn sunnudag.
Gyða, sem er 16 ára gömul, var fyrir nokkru valin mótorhjóla- og snjósleðakona Íslands árið 2015 af MSÍ og hlaut viðurkenningu frá ÍSÍ fyrir frábæran árangur á árinu. Hún stóð sig frábærlega á síðasta ári í sinni íþrótt, en hún varð Íslandsmeistari í motocrossi kvenna og sigraði í öllum keppnum á mótaröðinni með nokkrum yfirburðum.
Tólf íþróttamenn voru tilnefndir í kjörinu um íþróttamann ársins þetta árið. Einnig voru viðurkenningar veittar til þeirra sem unnið hafa bikar- eða Íslandsmeistaratitil á árinu eða hafa keppt með landsliði Íslands í sinni grein.
Auk Gyðu Daggar voru tilnefnd þau Aðalbjörg Ýr Sigurbergsdóttir fyrir fimleika, Arna Björg Auðunsdóttir fyrir fimleika, Atli Freyr Maríönnuson fyrir hestaíþróttir, Berglind Dan Róbertsdóttir fyrir badminton, Eva Lind Elíasdóttir fyrir knattspyrnu og frjálsar íþróttir, Grétar Ingi Erlendsson fyrir körfuknattleik, Guðmundur Karl Guðmundsson fyrir knattspyrnu, Ingvar Jónsson fyrir golf, Monika Sjöfn Pálsdóttir fyrir hestaíþróttir, Styrmir Dan Steinunnarson fyrir frjálsar íþróttir og Þorkell Þráinsson fyrir knattspyrnu.