Fjórir keppendur frá Judofélagi Suðurlands tóku þátt á Vormóti Judosambands Íslands sem fram fór í ÍR-heimilinu um síðustu helgi og uppskáru þau öll sæti á verðlaunapalli.
Agla Ósk Ólafsdóttir hélt uppteknum hætti og sigraði í -70 kg flokki en Arnar Helgi Arnarsson varð að lúta í gras í úrslitaglímu í +100 kg flokki og fékk því silfur.
Sara Ingólfsdóttir vann bronsverðlaun í -63kg flokki og það sama gerði nýliðinn Haraldur Ásgeir Haraldsson í -100 kg flokki.
Keppendur Judofélags Suðurlands glímdu vel þennan daginn og eru sannarlega að setja mark sitt á judoheiminn og má segja að niðurstaðan hafi verið ánægjuleg í alla staði.