Guðni Ingvarsson var tekinn inn í heiðurshöll Selfoss handbolta síðastliðið laugardagskvöld á upphitunarkvöldi tímabilsins sem haldið var á þéttsetnu Sviðinu. Guðni er þar með sjöundi maðurinn sem hlýtur þessa nafnbót, en þar komast eingöngu þeir einstaklingar sem hafa spilað með félaginu í 10 tímabil.
Guðni er fæddur og uppalinn í Skarði í Landsveit. Honum var ekið á æfingar á Selfossi upp alla yngri flokka þar sem hann hlaut sitt handboltalega uppeldi. Hann er línumaður að Guðs náð og hefur ávallt verið mikill leiðtogi og haft sterka rödd innan liðsins. Hann lék með meistaraflokki Selfoss frá árinu 2007-2012 áður en hann færði sig um set og lék nokkur ár í Vestmannaeyjum og varð þar bikarmeistari með liðinu ásamt því að vinna fyrsta Íslandsmeistaratitil liðsins árið 2014.
Hann stoppaði síðan stutt við í Gróttu áður en hann sneri aftur heim á Selfoss árið 2016 þar sem hann átti stóran þátt í frábærum árangri liðsins í Olísdeildinni þar sem liðið varð meðal annars Íslandsmeistari í fyrsta sinn. Að leikmannaferlinum loknum var hann aðstoðarþjálfari eitt tímabil með Þóri Ólafssyni.
Á ferlinum hefur Guðni leikið 195 leiki fyrir félagið og skorað í þeim 362 mörk.
Guðni Ingvarsson á svo sannarlega heima í heiðurshöll Selfoss handbolta og þar sitja nú með honum þeir Atli Kristinsson, Ramunas Mikalonis, Hörður Bjarnarson, Sebastian Alexandersson, Ómar Vignir Helgason og Gylfi Már Ágústsson.
