„Ég óska karlaliði Selfoss í handbolta hjartanlega til hamingju með Íslandsmeistaratitilinn. Er ekki vanur að senda liðum slíkar kveðjur en veðja á að mér fyrirgefist undantekningin í þetta sinn,“ segir Guðni Th. Jóhannesson, forseti Íslands, í færslu á Facebook í kvöld.
Guðni sendir þar Selfyssingum og Patreki bróður sínum heillaóskir í tilefni af fyrsta Íslandsmeistaratitli félagsins í boltaíþrótt í meistaraflokki.
„Fyrir nær 40 árum stóð pabbi að handboltanámskeiði á Selfossi með fleirum og segjum bara að nú reki Patti smiðshöggið á uppbygginguna sem þá hófst! Aftur til hamingju, kæru Selfyssingar,“ segir Guðni, en færslu hans má sjá hér að neðan.