Guðmundur Kr. kjörinn heiðursfélagi Umf. Selfoss

(F.v.) Hlöðver Örn og Lára sæmd silfurmerki félagsins, Guðmundur Kr. heiðursfélagi, Þórir Haraldsson formaður handknattleiksdeildar sem hlaut UMFÍ bikarinn sem deild ársins, Helga R. Einarsdóttir móðir Guðmundar Karls tók við Björns Blöndals bikarnum fyrir hönd Guðmundar og Viktor formaður Umf. Selfoss. Ljósmynd: Umf. Selfoss/Gissur

Á aðalfundi Ungmennafélags Selfoss sem fram fór í félagsheimilinu Tíbrá þann 4. apríl síðastliðinn var Guðmundur Kr. Jónsson kjörinn heiðursfélagi.

Guðmundur varð snemma mjög öflugur félagsmálamaður og hefur tekið virkan þátt í starfi Umf. Selfoss frá unga aldri. Hann var formaður frjálsíþróttadeildar árin 1968-1979, gegndi síðar stöðu vallarstjóra á Selfossvelli, stöðu framkvæmdastjóra félagsins og var formaður félagsins frá 2014-2018.

Guðmundur tekur enn virkan þátt í störfum ungmennafélagsins, mætir á alla viðburði sem hann kemst á og er þulur og ræsir á hinum ýmsu viðburðum frjálsíþróttadeildar. Á héraðsþingi HSK í fyrra var hann kosinn er heiðursformaður HSK sá þriðji frá upphafi.

Guðmundur Kr. er fjórtándi heiðursfélagi félagsins en núlifandi eru Kristján S. Jónsson, Tómas Jónsson, Björn Ingi Gíslason og Sigurður Jónsson.

Lára og Hlöðver sæmd silfurmerki
Við þetta sama tækifæri var Lára Ólafsdóttir, eiginkona Guðmundar, sæmd silfurmerki Umf. Selfoss en hún hefur starfað um árabil innan frjálsíþróttadeildar Selfoss sem gjaldkeri í stjórn, á fjölmörgum mótum og við Brúarhlaupið frá upphafi auk þess sem hún hefur fætt fleiri þúsundir munna á mótum vítt og breitt um landið með Selfoss.

Þá var Hlöðver Örn Rafnsson einnig sæmdur silfurmerki Umf. Selfoss en hann kom inn í starf knattspyrnudeildar á 9. áratug seinustu aldar sem þjálfari og síðar sem stjórnarmaður þar sem hann lyfti grettistaki við að rétta af fjárhag deildarinnar. Hann er jafnframt frumkvöðull varðandi herrakvöld knattspyrnudeildar.

Stjórn félagsins endurkjörin
Stjórn félagsins var endurkjörin á fundinum en hana skipa Viktor S. Pálsson formaður, Hjalti Þorvarðarson gjaldkeri, Dýrfinna Sigurjónsdóttir ritari og Sigrún Hreiðarsdóttir og Sverrir Einarsson meðstjórnendur.

Á fundinum voru veittar viðurkenningar þar sem Guðmundi Karli Sigurdórssyni var afhentur Björns Blöndal bikarinn sem félagi ársins fyrir framúrskarandi sjálfboðaliðastörf á vegum félagsins en hann hefur verið manna duglegastur að skrásetja sögu félagsins bæði í myndum og texta, ávallt tilbúinn þegar til hans er leitað. Handknattleiksdeild félagsins hlaut UMFÍ bikarinn sem deild ársins fyrir góðan árangur meistaraflokks karla í Evrópukeppni og á Íslandsmóti.

Félagið einn stærsti launagreiðandi sveitarfélagsins
Rekstur félagsins er að mestu í samræmi við áætlun en ljóst er á öllum rekstrartölum að öflugt og metnaðarfullt starf er í gangi hjá félaginu. Þannig var velta félagsins árið 2018 tæplega 430 milljónir króna og er félagið einn stærsti launagreiðandi í sveitarfélaginu en það greiðir árlega nærri 250 milljónir í laun og launatengd gjöld samkvæmt því sem fram kemur í samstæðureikningi.