Guðmundur Karl Sigurdórsson, fjölmiðlamaður og fyrrum formaður Knattspyrnufélags Árborgar, var sæmdur silfurmerki Héraðssambandsins Skarphéðins á héraðsþingi HSK á Borg í Grímsnesi í síðustu viku.
Guðmundur Karl hefur um árabil tekið þátt í störfum íþrótta- og ungmennafélagshreyfingarinnar. Hann hefur séð um umbrot á ársskýrslu HSK frá árinu 2003 og af slíkum myndarskap að eftir hefur verið tekið. Hann sat í tíu ár í valnefnd HSK, en sú nefnd sér um að velja íþróttakarl og íþróttakonu HSK.
Guðmundur var einn af aðalhvatamönnum að stofnun Knattspyrnufélags Árborgar árið 2000 og var á stofnfundi kosinn fyrsti formaður félagsins og gengdi því embætti í átta ár og hefur lengst af síðan verið einn af helstu bakhjörlum og driffjöðrum félagsins.
Í rúma þrjá áratugi hefur Guðmundur starfað við blaðamennsku og skrifað um íþróttir, síðustu 16 ár á sunnlenska.is en þar birtast nær daglega fréttir af sunnlensku íþróttafólki, viðburðum og fundum, sem er ómetanlegt fyrir íþróttahreyfinguna í héraði. Hann hefur einnig komið að útgáfumálum fyrir Umf. Selfoss og Knattspyrnufélag
Árborgar og starfað sem sjálfboðaliði fyrir knattspyrnu- og frjálsíþróttadeildir Umf. Selfoss.
Gull- og silfurmerki HSK voru veitt í fyrsta sinn árið 2010 og fram að þessu hafa 18 einstaklingar hlotið gullmerki og 18 einstaklingar silfurmerki.