Handknattleiksmaðurinn Guðmundur Árni Ólafsson frá Selfossi hefur samið við danska úrvalsdeildarliðið Mors-Thy.
Guðmundur Árni hefur undanfarin ár leikið með Bjerringbro/Silkeborg í dönsku úrvalsdeildinni og var m.a. í silfurliði liðsins í deildinni fyrir ári.
Samningur Guðmundar Árna er til eins árs. „Ég er afar sáttur við samninginn og að fá tækifæri til þess að leika áfram í dönsku úrvalsdeildinni,“ sagði Guðmundur Árni í samtali við Morgunblaðið. Guðmundur lék í yngri flokkunum og upp í meistaraflokk með Selfossi en skipti í raðir Hauka og spilaði þar frá 2009 til 2011 áður en hann flutti til Danmerkur.
„Forráðamenn Mors-Thy höfðu fylgst með mér um nokkurt skeið en skömmu eftir áramótin höfðu þeir samband við mig og vildu gera mér tilboð og nú eru þau mál í höfn. Ég verð fyrsti hægri hornamaður liðsins og fæ þar með væntanlega fleiri tækifæri til að spila en hjá Bjerringbro/Silkeborg,“ sagði Guðmundur Árni sem mátti sætta sig við að fá færri tækifæri með liðinu á síðasta keppnistímabili en hann vildi.