Noregsmeistarar Rosenborg hafa keypt Selfyssinginn Guðmund Þórarinsson í sínar raðir frá danska liðinu Nordsjælland. Guðmundur skrifaði undir þriggja og hálfs árs samning við Rosenborg.
Guðmundur hefur leikið fyrir öll yngri landslið Íslands auk þess að eiga þrjá leiki fyrir A-landsliðið, síðast lék hann fyrir landsliðið gegn Bandaríkjunum í janúar.
Guðmundur spilaði áður tvö tímabil með Sarpsborg í Noregi en Rosenborg hefur haft hann lengi í sigtinu.
„Hann þekkir norska fótboltann vel og gefur okkur fleiri möguleika á miðjunni,“ sagði Stig Inge Björnebye, yfirmaður íþróttamála hjá Rosenborg, og fyrrum leikmaður Liverpool.
Rosenborg er ríkjandi Noregsmeistari og stórveldi í Skandinavíu en fyrir hjá félaginu eru tveir Íslendingar; Hólmar Örn Eyjólfsson og Matthías Vilhjálmsson.