Guðmunda og Jagačić leikmenn ársins

Guðmunda Brynja Óladóttir og Luka Jagačić voru valin leikmenn ársins á glæsilegu lokahófi Knattspyrnudeildar Umf. Selfoss sem haldið var í Hvítahúsinu um síðustu helgi.

Fjöldi viðurkenninga var veittur á lokahófinu. Guðmunda var leikmaður ársins og markadrottning kvennaliðsins, Erna Guðjónsdóttir var efnilegust, Kristrún Rut Antonsdóttir fékk verðlaun fyrir framfarir og ástundun og Katrín Ýr Friðgeirsdóttir fékk Guðjónsbikarinn.

Í meistaraflokki karla var Jagačić valinn bestur og var sömuleiðis markakóngur liðsins. Þorsteinn Daníel Þorsteinsson var efnilegastur og Haukur Ingi Gunnarsson fékk verðlaun fyrir framfarir og ástundun. Guðjónsbikarinn kom í hlut Einars Ottó Antonssonar.

Fjölmargir leikmenn fengu viðurkenningu fyrir leikjafjölda. 50 leikja viðurkenningu fengu Bríet Mörk Ómarsdóttir, Erna Guðjónsdóttir, Eva Lind Elíasdóttir, Hrafnhildur Hauksdóttir, Kristrún Rut Antonsdóttir, Þorsteinn Daníel Þorsteinsson, Magnús Ingi Einarsson, Svavar Berg Jóhannsson og Luka Jagačić. 100 leikja viðurkenningu fengu Anna María Friðgeirsdóttir, Katrín Ýr Friðgeirsdóttir, Guðmunda Brynja Óladóttir og Andrew James Pew. Ingi Rafn Ingibergsson fékk viðurkenningu fyrir 150 leiki og Einar Ottó Antonsson fyrir 250 leiki.

Í 2. flokki kvenna var Sunneva Hrönn Sigurvinsdóttir valin leikmaður ársins, Katrín Rúnarsdóttir var markahæst og Harpa Hlíf Guðjónsdóttir fékk verðlaun fyrir framfarir og ástundun. Í 2. flokki karla var Birkir Pétursson leikmaður ársins, Ísak Eldjárn Tómasson markahæstur og þeir Freyr Sigurjónsson og Richard Sæþór Sigurðsson deildu verðlaunum fyrir framfarir og ástundun.

Hjónin Gissur Jónsson og Hafdís Jóna Guðmundsdóttir og Sigurður Sigurjónsson og Svandís Ragnarsdóttir fengu viðurkenningu fyrir óeigingjarnt starf í þágu deildarinnar fyrir að taka leikmenn meistaraflokks kvenna inn á heimili sín.

Félagar ársins voru tvíburasysturnar síkátu þær Selma og Alma Sigurjónsdætur fyrir frábært starf en þær hafa starfað á öllum stöðum hvort sem er meistaraflokki kvenna eða karla og verið í unglingaráði í mörg ár.

Að loknu borðhaldi og skemmtiatriðum undir stjórn Einars Bárðarsonar skemmti Sálin hans Jóns míns knattspyrnufólki fram á nótt.