Grímur ráðinn þjálfari Selfoss

Grímur Hergeirsson. sunnlenska.is/Guðmundur Karl

Selfyssingar hafa ráðið Grím Hergeirsson þjálfara meistaraflokks karla í handbolta til næstu tveggja ára.

Grímur er Selfyssingur í húð og hár og hefur verið aðstoðarþjálfari liðsins undanfarin fjögur ár. Hann tekur við sem aðalþjálfari af Patreki Jóhannessyni sem vann það afrek að gera Selfyssinga að Íslandsmeisturum í vor. Patrekur heldur nú til starfa hjá Skjern í Danmörku.

Í tilkynningu frá stjórn deildarinnar kemur fram að þar á bæ séu menn gríðarlega ánægðir með að Grímur hafi ákveðið að taka slaginn með liðið og bindur stjórnin miklar vonir við gengi liðsins í komandi átökum næsta vetur, bæði hér heima og í Evrópu.

Þórir Haraldsson, formaður handknattleiksdeildarinnar og Grímur handsala samninginn. Ljósmynd/Aðsend