Feikna sterkur fjórgangur í Suðurlandsdeildinni

Gríðarlega sterk keppni var í gærkvöldi í Suðurlandsdeildinni í hestaíþróttum þar sem keppt var í  fjórgangi.

Í úrslitum atvinnumanna þurfti sætaröðun til þess að skera úr um sigurvegara og voru það Elin Holst og Gígur frá Ketilsstöðum sem sigruðu en Brynja Amble á Goða frá Ketilsstöðum liðsfélagi hennar í liði Byko varð í öðru sæti.

Í úrslitum áhugamanna var Elín Magnea Björnsdóttir á Melódíu frá Hjarðarholti sem sigraði eftir gríðarlega sterk úrslit þar sem 8 knapar áttu sæti.

Það var lið Krappa sem sigraði liðakeppnina í fjórgang en lið þeirra átti 3 knapa í úrslitum það voru Lea Schell á Kná frá Korpu sem endaði í 6. sæti í flokki atvinnumanna og í flokki áhugamanna voru það Karen Konráðsdóttir á Lilju frá Kvistum sem endaði í fjórða sæti og Þorgils Kári Sigurðsson á Fák frá Kaldbak endaði í þriðja sæti. Glæsilegur árangur hjá liði Krappa.

Eftir fyrstu tvær keppnirnar er það lið Byko sem leiðir liðakeppnina með 142 stig en lið Húsasmiðjunnar kemur fast á hæla þeirra með 133 stig.

Að venju voru 48 knapar úr tólf liðum sem öttu kappi. Frábær stemming var í höllinni og full stúka. Fóðurblandan gaf öllum knöpum í úrslitum fóðurbæti í verðlaun og var einnig með kynningu í anddyri Rangárhallarinnar.