Samstarf Knattspyrnufélags Rangæinga og Sláturfélags Suðurlands hefur staðið yfir í heil 13 ár, en samningur á milli þeirra var fyrst gerður árið 2013. Í meira en áratug hefur þetta öfluga samstarf verið ein helsta lykilstoðin í íþróttastarfi á Hvolsvelli. Með samningnum veitir SS félaginu árlegan fjárstyrk sem dreifist til allra flokka KFR, allt frá yngstu kynslóðinni upp í meistaraflokka.
Þetta langvarandi samstarf og stuðningur er áberandi í öllu starfi félagsins. Knattspyrnuvöllurinn á Hvolsvelli hefur borið heitið SS-völlurinn í rúman áratug og er merki SS framan á öllum keppnisbúningum KFR rótgróin hefð.
Veitingar og stuðningur á öllum leikjum og í fjáröflunum
Auk rausnarlegs peningastyrks hefur SS séð félaginu fyrir grillveitingum á leikjum og viðburðum í meira en áratug.
Grillaðar hafa verið tugþúsundir SS-pylsa í áratug og síðastliðin tvö ár hefur Viktor Steingrímsson, yfirþjálfari KFR og grillmeistari, boðið upp á hinn fræga SS-KFR hamborgara á öllum heimaleikjum meistaraflokka KFR. Einnig hefur SS gefið pylsur, meðlæti og annað kjötmeti á fjölmörg mót og viðburði yngri flokka og á lokahófum félagsins.
Aðalbakhjarl félagsins og helsti tengiliður KFR við SS í gegnum þetta áratugalanga samstarf er Benedikt Benediktsson, framleiðslustjóri SS, sem hefur reynst sem helsti stuðningsmaður KFR.
Samstarfssamningurinn var endurnýjaður fyrir síðustu leiki 5. flokks karla á Íslandsmótinu sem fram fóru á SS-vellinum 2. september síðastliðinn. Undir samninginn skrifuðu Benedikt Benediktsson framleiðslustjóri SS og fyrrverandi formaður KFR, Tinna Erlingsdóttir formaður KFR og Viktor Steingrímsson starfandi yfirþjálfari KFR, einn af stofnendum KFR og fyrrverandi formaður KFR. Þess má geta að félagið fagnar 30 ára afmæli sínu á næsta ári.
