Fyrr í mánuðinum var haldin kynning á göngufótbolta á Selfossi fyrir þjálfara og aðra áhugasama, þar sem farið var yfir grunnatriðin í íþróttinni. Kynningarfundurinn var hluti af átaki sem Knattspyrnusamband Íslands og Ungmennafélag Íslands standa fyrir.
„Göngufótbolti er í raun og veru fótbolti, þar sem ekki má hlaupa eða tudda. Hann er spilaður á litlum velli, með litlum mörkum og það er enginn markmaður. Lykilatriði í göngufótbolta er að allir njóti þess að vera saman og séu vinir. Þetta hentar mjög breiðum aldurshóp og það hvernig fótboltinn er stundaður fer eftir því hvernig hópurinn er,“ segir Rúnar Már Sverrisson, nefndarmaður í Grasrótarnefnd KSÍ.
Rúnar Már hefur sjálfur stundað íþróttina um árabil og er umsjónarmaður göngufótboltans hjá Knattspyrnufélaginu Þrótti í Reykjavík.
„Við erum búin að vera með þetta í tíu ár í Þrótti. Þar eru reyndar eingöngu karlar að æfa, sá elsti 78 ára og sá yngsti 43 ára. Þarna eru allir á sínum forsendum og njóta þess að vera saman. Í rauninni snýst göngufótbolti ekki um fótbolta. Fótboltinn er þarna sem verkfæri til þess að skemmta sér, það vill til að hann er skemmtilegur og hvernig hann reynir á líkamann,“ bætir Rúnar við.
Göngufótboltinn verður kynntur í átta kaupstöðum á landsbyggðinni en sem fyrr segir eru það KSÍ og UMFÍ sem standa að verkefninu.
„Við byrjum hér á Selfossi og ég vona að í framhaldinu verði til hérna samfélag sem nýtur þess að hittast og fara í smá fótbolta og fer svo í kaffi á eftir. Það er vísindalega sannað að göngufótboltinn heldur niðri og hjálpar til við marga lífsstílssjúkdóma og við tengjumst dönsku verkefni sem nefnist Football is Medicine og fylgjum þeim fræðum,“ segir að lokum.
Dagana 19.-20. júní verður haldið alþjóðlegt göngufótboltamót í Reykjavík undir merkjum Rey Cup og daginn áður verður haldin ráðstefna í Háskóla Íslands þar sem danski prófessorinn Peter Krustrup, guðfaðir Football is Medicine, verður lykilfyrirlesari.
