Það er heldur betur kominn vorhugur í kylfinga en golfvellir hér sunnanlands opna nú einn af öðrum fyrir sumarið. Golfvöllur GKH í Hraunborgum í Grímsnes- og Grafningshreppi verður opnaður á sumardaginn fyrsta.
Golfbílar verða reyndar ekki heimilaðir að svo stöddu og ekki má slá af teigum. Opnunin verður betur kynnt á nýrri heimasíðu Golfklúbbs Hraunborga, sem opnuð verður á morgun, gkh.is.
Golfklúbbur Hraunborga var stofnaður árið 2013 en félagið er nýjasta aðildarfélag Héraðssambandsins Skarphéðins. Aðild félagsins var formlega samþykkt á héraðsþingi HSK á Borg í Grímsnesi þann 26. mars síðastliðinn.
Klúbburinn rekur níu holu golfvöll á landi Sjómannadagsráðs, en félagið tók formlega við rekstri vallarins með samkomulagi árið 2019, eftir að hann hafði áður verið í höndum Sjómannadagsráðs. Félagsmenn telja nú um 200 og fer sá fjöldi vaxandi.