Hamar/Þór vann góðan sigur á Keflavík í úrvalsdeild kvenna í körfubolta í dag. Lokatölur í Þorlákshöfn urðu 88-85.
Hamar/Þór byrjaði leikinn vel og staðan í hálfleik var 36-26. Sóknarleikur liðanna batnaði í seinni hálfleiknum, Hamar/Þór hélt forskotinu allan 3. leikhluta en í þeim fjórða hljóp mikil spenna í leikinn og þegar fjórar og hálf mínútur voru eftir af leiknum jafnaði Keflavík 69-69.
Nær komust gestirnir ekki, Hamar/Þór hélt haus á lokakaflanum og tryggði sér að lokum sanngjarnan sigur.
Jovana Markovic var stigahæst hjá Hamri/Þór með 25 stig en Jada Guinn var framlagshæst með 22 stig, 6 fráköst og 6 stoðsendingar.
Hamar er í 4. sæti B-riðilsins með 10 stig en Keflavík í toppsætinu með 22 stig.
Hamar/Þór-Keflavík 88-85 (22-14, 14-12, 25-27, 27-32)
Tölfræði Hamars/Þórs: Jovana Markovic 25/7 fráköst, Jada Guinn 22/6 fráköst/6 stoðsendingar, Ana Clara Paz 21/8 fráköst/5 stoðsendingar, Mariana Duran 14/5 fráköst/7 stoðsendingar, Bergdís Anna Magnúsdóttir 4, Dagrún Inga Jónsdóttir 2.