Jonathan Glenn hefur látið af störfum sem þjálfari kvennaliðs Selfoss í knattspyrnu en hann tók við liðinu síðasta haust.
Glenn náði góðum árangri með liðið í sumar en nýliðar Selfoss luku keppni í 5. sæti 1. deildarinnar.
„Þetta var ekki auðveld ákvörðun, en fjarlægðin og ferðalögin sem starfinu fylgja hafa gert mér erfitt fyrir að samræma fótboltann og fjölskyldulífið. Vonin var sú að við gætum fundið lausn sem gerði mér og fjölskyldu minni kleift að flytja nær, en því miður varð það ekki að veruleika,“ segir Glenn.
„Ég er ótrúlega þakklátur fyrir tækifærið, fólkið sem ég hef unnið með og allt sem við áorkuðum saman á tímabilinu. Það hafa verið mikil forréttindi að fá að leiða þennan hóp og ég óska Selfossi alls hins besta í framtíðinni,“ segir Glenn ennfremur.