Selfoss gerði sér lítið fyrir og skellti KR í kvöld í 1. deild kvenna í knattspyrnu. Lokatölur á Selfossvelli voru 2-1.
Selfoss hefur þar með lagt að velli tvö efstu liðin í deildinni á síðustu vikum eftir góðan sigur á Gróttu á dögunum.
Leikurinn í kvöld var markalaus í fyrri hálfleik en á sjöttu mínútu seinni hálfleiks kom Embla Dís Gunnarsdóttir Selfyssingum yfir. Olga Lind Gestsdóttir bætti öðru marki við á 82. mínútu og gulltryggði þar sigurinn en KR átti reyndar lokaorðið. Þær fengu vítaspyrnu mínútu fyrir leikslok og skoruðu síðasta mark leiksins úr henni.
Selfoss er í 5. sæti deildarinnar með 13 stig en KR er í 2. sæti með 19 stig.