Selfoss vann frábæran sigur á Haukum í oddaleik í umspili um sæti í úrvalsdeild karla í körfubolta á Ásvöllum í kvöld. Lokatölur urðu 76-86 og Selfyssingar mæta Sindra í 4-liða úrslitum.
Selfyssingar voru virkilega sannfærandi í kvöld og höfðu undirtökin stærstan hluta leiksins. Staðan í hálfleik var 34-45. Haukar klóruðu í bakkann í 4. leikhluta en Selfyssingar voru búnir að byggja upp gott forskot og héldu heimamönnum í hæfilegri fjarlægð.
Collin Pryor var besti maður vallarins í kvöld, hann skoraði 19 stig og tók 16 fráköst.
Selfoss vann því einvígið 3-2 og mætir Sindra í undanúrslitum. Fyrsti leikurinn verður á Hornafirði á fimmtudaginn.
Haukar-Selfoss 76-86 (20-23, 14-22, 17-21, 25-20)
Tölfræði Selfoss: Collin Pryor 19/16 fráköst, Steven Lyles 18/10 fráköst, Tristan Máni Morthens 12, Ari Hrannar Bjarmason 12, Kristijan Vladovic 10/4 fráköst/10 stoðsendingar, Óðinn Freyr Árnason 7, Fjölnir Morthens 6, Gísli Steinn Hjaltason 2.