Golfhátíð kylfinga yngri en 14 ára var haldin dagana 11. og 12. júní á Selsvelli hjá Golfklúbbnum Flúðum. Alls tóku 115 krakkar þátt ásamt þjálfurum og voru nokkrir foreldrar með í för.
Mikil gleði ríkti á Selsvelli og á Flúðum þessa daga þar sem kylfingarnir ungu léku sér, æfðu og nutu samverunnar í frábæru umhverfi. Völlurinn skartaði sínu fegursta og veðrið lék við þátttakendur báða dagana. Það var m.a. spilað golf, farið í sund, boltar slegnir á æfingasvæðinu og reynt að hitta í hitta í hjólbörur með sandi í og fleira.
Borðað var saman í Kaffi-Sel í hádeginu og kvöldmatnum og síðan gist í íþróttahúsinu á Flúðum.
Í stað þess að leika hefðbundinn 9 eða 18 holu hring var Selsvelli skipt upp í margar stöðvar. Þar fengu þátttakendur meðal annars að spila, æfa vipp og slátt undir handleiðslu landsliðs- og atvinnukylfinga. Einnig var settur upp púttvöllur og fótboltagolfvöllur sem reyndust mjög vinsælir á meðal krakkanna.
